Grupi Parlamentar i PDK-së ka dorëzuar në Kuvend mocionin për interpelancë me kryeministrin Avdullah Hoti lidhur me përgjegjësitë në raport me zhvillimet në procesin e dialogut në Bruksel dhe punën e grupeve teknike.
PDK-ja kërkon që në këtë seancë Hoti të raportojë për secilën pikë një nga një të çështjeve të diskutuara në Bruksel.
Po ashtu, PDK kërkon që kryeministri të arsyetojë secilin prej këtyre zotimeve, pasi që ai, sipas kësaj partie, disa herë me radhë ka deklaruar se në Bruksel është draftuar kapitulli i marrëveshjes përfundimtare për të pagjeturit.
“Çështja e të pagjeturve është njëra nga problemet më të rëndësishme që kërkon zgjidhje, ndërkaq Qeveria dhe udhëheqësi i saj z. Hoti, nuk kanë treguar vullnetin më të vogël për të ofruar transparencën e nevojshme lidhur më këtë proces. Kryeministri nuk fshehur dhe nuk ka treguar as për aspektet organizative të procesit si, përbërja e grupit të ekspertëve, kredencialet personale, kombëtare apo akademike, dhe përvojën e tyre përkatëse”, thuhet në shkresën e Grupit Parlamentar të PDK-së.
Çështje tjetër që është përmendur nga ana e Kryeministrit, sipas PDK-së, është edhe koncept dokumenti i diskutimit për dëmet e luftës.
“Edhe në këtë pikë mungon transparenca. Vazhdon të mbetet ende e paqartë se çka është duke kërkuar Qeveria dhe cili është plani konkret i saj për arritjen e zgjidhjes së këtij problemi, si njëra ndër temat më të rëndësishme të dialogut”, thekson GP i PDK-së.
PDK-ja thotë se meqë Kryeministri Hoti vazhdimisht ka deklaruar suksese nga puna e grupeve teknike, “Kuvendi i Republikës së Kosovës duhet të informohet për këto “suksese”, të cilat të paktën deri më tani, kanë mbetur në nivel deklarativ përderisa nuk ka asnjë hap konkret për zgjidhje, qoftë të një problemi të vetëm”.
“Prandaj, deputetët e Grupit Parlamentar të Partisë Demokratike të Kosovës parashtruesë të këtij mocioni kërkojnë që në këtë Interpelancë, Kryeministri Hoti të raportojë veçanërisht për procesin e përgjithshëm të dialogut të zhvilluar në Bruksel, për secilën temë veç-e-veç që ka qenë apo është objekt i diskutimit nga ana e grupeve teknike”, ka përfunduar GP i PDK-së.
