Kryeministri i Kosovës, Avdullah Hoti, ka takuar sot akterët kryesorë të menaxhimit të pandemisë. Në këtë takim ai ka kërkuar mbikëqyrje rigoroze të masave anti-Covid.
Kjo është bërë e ditur përmes një njoftimi për media nga zyra e Kryeministrit.
“Pas analizës së hollësishme me të gjitha institucionet kompetente për menaxhimin e situatës me pandeminë Covid-19, Kryeministri i Republikës së Kosovës, z. Avdullah Hoti ka kërkuar nga inspektorati, policia dhe shtabet komunale shtimin e angazhimit të përgjithshëm dhe zbatimin rigoroz të masave për parandalimin dhe menaxhimin e situatës epidemiologjike me Covid-19”, thuhet në njoftim.
Hoti ka kërkuar që të ketë përgatitje intensive dhe koordinim për mbikëqyrje të respektimit të masave anti-Covid sidomos për festat e fundvitit.
Kryeministri Hoti, në takim me ministrin e Shëndetësisë, Armend Zemaj, atë Tregtisë dhe Industrisë, Vesel Krasniqi, ministrin e Punës dhe Mirëqenies Sociale, Skender Reçica dhe me përfaqësues të inspektoratit të policisë, atij farmaceutik, sanitar dhe inspektoratit shëndetësor, kërkoi përgatitje intensive dhe koordinim për mbikëqyrje të respektimit të masave anti Covid -19 sidomos gjatë periudhës së festave të fundvitit”, thuhet në njoftim.
