Ish-deputeti i PDK-së nuk pret që të ketë probleme në këtë bashkëpunim me Kurtin për shkak të bindjeve politike.
Kryeministri i Republikës së Kosovës, Albin Kurti, e ka emëruar Andin Hotin, Kryesues të Komisionit Qeveritar për Personat e Zhdukur.
Hoti për RTV Dukagjinin këtë emërim nga ana e Kurtit e ka quajtur përgjegjësi të madhe.
“Këtë nuk e konsideroj pozitë pune, por obligim moral. Së pari si familjarë i personit të zhdukur e më pas si qytetarë që e kam obligim të ndihmojë në shërimin e kësaj plage”.
Djali i Ukshin Hotit thotë se çështja e të pagjeturve është plagë e madhe në Kosovë dhe sipas tij kjo pozitë nuk është aspak e lehtë për të.
Ai thotë se shpresojnë që përmes presionit të bashkësisë ndërkombëtare të detyrojnë Serbinë të hapë arkivat dhe të tregojë për fatin e personave të zhdukur në Kosovë.
Hoti thotë pavarësisht bindjeve politike, kjo çështje edhe nga Kurti është cilësuar si humane.
“Nga ana tjetër edhe kryetari i PDK-së e ka dhënë mbështetjen e plotë të tij që të përkrahim këtë çështje humane. Qëllimi i të gjitha subjekteve politike është që të zbardhet fati i personave të pagjetur. Besoj se do të ketë shumë bashkëpunim në këtë drejtim”
Ndryshe, Andin Hoti, është djali i Ukshin Hotit, intelektualit dhe veprimtarit të shquar të çështjes kombëtare, i cili rezulton i zhdukur tash e 22 vite.
Më 16 maj të vitit 1999 në rrethana ende të pa ndriçuara është zhdukur Ukshin Hoti.
Veprimtari i mirënjohur i Lëvizjes Kombëtare, profesori Ukshin Hoti u lind më 17 qershor të vitit 1943 në fshatin Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare gjatë viteve 1981-1999.
Ukshin Hoti ka qenë edhe ligjërues ne disa universitete të Amerikës ku dhe kishte studiuar dhe diplomuar.
