Kryetari i Gjykatës Themelore të Gjilanit, Ramiz Azizi gjatë ditës së premte ka mbajtur një konferencë për media me gazetarë, ku ka shpalosur raportin për muajin prill – qershor 2021.
Azizi ka deklaruar se në bazë të dhënave statistikore, Gjykata Themelore e Gjilanit, ka dal e para në nivel të vendit.
“Ajo që shihet në të dhënat statistikore, Gjykata Themelore e Gjilanit, së bashku me Degët Kamenicë, Viti dhe Novobërdë, ka dal e para në zgjidhjen e lëndëve, me 101 % të kryerjes së lëndëve. Kjo po tregon që jemi kthyer në normalitet të punës nga pandemia që na ka shkaktuar jashtëzakonisht shumë vështirësi në punë, po besoj që gjatë muajve të ardhshëm do të rrisim edhe më shumë këtë përqindje”, ka thënë Azizi.
Duke folur për rastet e korrupsionit, Azizi ka thënë se gjatë këtij viti kemi pranuar 6 lëndë që janë të natyrës së korrupsionit, ndërkohë janë kryer 9 lëndë të kësaj natyre gjatë kësaj periudhe kohore.
“Numri i lëndëve të korrupsionit në Gjykatën tonë aktualisht është 15 lëndë. Ju njoftojë që këto lëndë janë të gjitha në procedurë, do të thotë janë në punë nga ana e gjyqtarëve. Nga këto 9 lëndë të kryera, janë disa aktgjykime me burgim, disa me gjobë, por ka edhe aktgjykime liruese”, theksoi ai.
Kryetari Azizi ka përmendur rastet e dhunës në familje, që sipas tij gjatë vitit të kaluar dhe këtë vit ka pasur një rritje të lehtë të numrit të veprave të kësaj natyre, por që këto lëndë zgjidhen me prioritet nga ana e gjyqtarëve.
Vështirësia në funksionimin e Gjykatës, Azizi përmendi mungesën e gjyqtarëve dhe stafit administrativ të mjaftueshëm, gjë që po ndikon në efikasitetin e Gjykatës.
#transparenca
