Familja Selaci nga Vushtrria, që humbën bijën e tyre 28 vjeçare nga COVID-19, Libertën, kanë falënderuar të gjithë qytetarët për ngushëllimet.
Përmes një shkrimi në Facebook, Mek Selaci në emër të kësaj familje ka thënë se falë besimit në Zot dhe përkrahjen e qytetarëve, po e kalojnë më lehtë këtë humbje.
Kjo familje ka bërë thirrje që qytetarët të vaksinohen duke ruajtur shëndetin e tyre dhe atyre që i rrethojnë.
“Vdekja e saj le të shërbej për gjithë neve si mesazh vetëdijesimi për respektimin e masave mbrojtëse nga ky virus. Ju lutemi, kujdesuni për veten tuaj dhe për gjithë ata që ju rrethojnë. Ajo çfarë kemi parë e përjetuar në këto javë, është vetë tmerri. Ju lutem, ju lutem deri në qiell, mos e neglizhoni këtë gjendje, mos e nënçmoni këtë pandemi. Vaksinohuni!”, thuhet në postimin e tyre.
Ndryshe, Liberta Selaci ndërroi jetë më 4 shtator pas infektimit me COVD-19. E ndjera punonte si grimere në Vushtrri./Telegrafi/
