Presidenti francez Emmanuel Macron deklaroi se situata me hantavirusin në Francë është “nën kontroll”, ndërsa bëri thirrje për një koordinim më të fortë mes vendeve evropiane për të parandaluar përhapjen e virusit. Gjatë një konference për shtyp në Nairobi, ai tha se autoritetet franceze kanë marrë masat e duhura dhe se sistemi shëndetësor po e menaxhon situatën me sukses.
Sipas Macron, Franca dhe disa vende të tjera evropiane kanë zbatuar protokolle shumë të rrepta bazuar në rekomandimet e ekspertëve dhe përvojat e mëparshme me sëmundje infektive.
Ai theksoi se Organizata Botërore e Shëndetësisë (OBSH) duhet të luajë rol kyç në koordinimin e masave ndërkombëtare në fazat e ardhshme, raporton Euronews Health transmeton Gazeta Shneta.
Ministrja franceze e Shëndetësisë, Stéphanie Rist, deklaroi se deri tani nuk ka prova për përhapje të gjerë të variantit Andes të hantavirusit në territorin francez dhe se autoritetet besojnë se virusi nuk ka pësuar mutacion.
Të gjitha rastet pozitive të identifikuara deri më tani lidhen me pasagjerë të një anijeje turistike.
Autoritetet kanë kontaktuar dhe testuar të gjithë personat që kanë pasur kontakt me rastet e konfirmuara. Ndërkohë, një grua franceze e infektuar vazhdon të jetë në gjendje kritike në Paris, ku po trajtohet me mushkëri artificiale për shkak të komplikimeve serioze në mushkëri dhe zemër.
Ekspertët e shëndetit publik e kanë cilësuar situatën si të pazakontë dhe kërkojnë vigjilencë të lartë.
Epidemiologët paralajmërojnë se, edhe pse rastet janë të kufizuara, koordinimi ndërkombëtar dhe reagimi i shpejtë mbeten thelbësore për të shmangur përhapjen e mëtejshme të virusit.
