Më shumë se 7,000 raste të një virusi të transmetuar nga mushkonjat janë raportuar në të gjithë provincën Guangdong të Kinës që nga korriku, duke nxitur masa të ngjashme me ato të marra gjatë pandemisë Covid-19.
Në qytetin Foshan, i cili është goditur më rëndë, pacientët me “chikungunya” duhet të qëndrojnë në spital, ku shtretërit e tyre do të mbrohen me rrjeta kundër mushkonjave. Ata mund të dalin nga spitali vetëm pasi të kenë rezultuar negativë në test ose në fund të një qëndrimi njëjavor, raporton BBC, transmeton Klankosova.tv.
I përhapur nëpërmjet pickimit të një mushkonje të infektuar, virusi shkakton ethe dhe dhimbje të forta të kyçeve, të cilat ndonjëherë mund të zgjasin me vite.
Edhe pse të rralla në Kinë, shpërthimet e “chikungunya” janë të zakonshme në Azinë Jugore dhe Juglindore dhe në pjesë të Afrikës.
Sa të përhapura janë infeksionet në Kinë?
Përveç Foshanit, të paktën 12 qytete të tjera në provincën jugore Guangdong kanë raportuar infeksione. Gati 3,000 raste u raportuan vetëm javën e fundit.
Të hënën, Hong Kongu raportoi rastin e parë – një djalë 12-vjeçar i cili pati ethe, skuqje dhe dhimbje kyçesh pasi udhëtoi në Foshan në korrik.
Virusi nuk është ngjitës dhe përhapet vetëm kur një person i infektuar pickohet nga një mushkonjë e cila më pas pickon të tjerët.
Zyrtarët thonë se të gjitha rastet e raportuara kanë qenë të lehta deri më tani, me 95% të pacientëve të liruar brenda shtatë ditësh.
Megjithatë, rastet kanë çuar në panik, duke pasur parasysh se virusi nuk është i njohur gjerësisht në vend.
ShBA-ja u ka kërkuar udhëtarëve në Kinë të tregojnë “kujdes të shtuar” pas shpërthimit.
Çfarë është “chikungunya”?
Shumica e njerëzve të pickuar nga një mushkonjë e infektuar do të zhvillojnë simptoma të “chikungunya” brenda tre deri në shtatë ditë.
Përveç etheve dhe dhimbjeve të kyçeve, simptoma të tjera përfshijnë skuqje, dhimbje koke, dhimbje muskujsh dhe ënjtje të kyçeve.
Në shumicën e rasteve, pacientët do të ndihen më mirë brenda një jave. Megjithatë, në raste të rënda, dhimbja e kyçeve mund të zgjasë për muaj ose edhe vite.
Ata që janë në rrezik për sëmundje më të rënda përfshijnë të porsalindurit, të moshuarit dhe njerëzit me gjendje shëndetësore paraprake, të tilla si sëmundjet e zemrës ose diabeti.
Nuk ka kurë, por vdekjet nga “chikungunya” janë të rralla.
Virusi u identifikua për herë të parë në Tanzani në vitin 1952. Më pas u përhap në vende të tjera në Afrikën Sub-Sahariane dhe Azinë Juglindore.
Deri më sot, është raportuar në më shumë se 110 vende.
Sipas Organizatës Botërore të Shëndetësisë, mënyra më e mirë për të parandaluar përhapjen e virusit është zvogëlimi i pellgjeve të ujit të ndenjur që lejojnë mushkonjat të shumohen. /Klankosova.tv
