Sipas të dhënave të publikuara nga Ministria e Punëve të Brendshme në profilin vjetor të migrimit thuhet se 156,080 banorë janë larguar nga Kosova në katër vitet e fundit, shkruan Reporteri.net.
“Bilanci i migrimit ndërkombëtar (migrimi neto) në Kosovë për vitin 2022 ishte – 30,889 banorë apo 1.75% e popullsisë rezidente. Për periudhën 2018-2022 vlerësohet se nga Kosova janë larguar 156,080 banorë apo rreth 8.85% e popullsisë së vendit”, thuhet në këto të dhëna.
Gjatë periudhës 2020-2022, në Kosovë imigruan 26,329 banorë, ndërsa emigruan mbi 93,005 banorë dhe popullata e Kosovës gjatë kësaj periudhe është zvogëluar për më shumë se 8,776 banorë.
Nëse merret si bazë popullsia që jetonte jashtë vendit më 1 prill 2011 (703,978 banorë vlerësohet se jetonin jashtë vendit), në fund të vitit 2022 vlerësohet se mbi 949,719 banorë apo 53.89 % e popullsisë së Kosovës jetonte jashtë vendit.
Kosova kërcënohet me migrim më të madh edhe pas liberalizimit të vizave nga 1 janari i këtij viti.
Zëdhënsja e aeroportit të Prishtinës, Valentina Gara ditën e djeshme ka bërë të ditur për Gazetën Online Reporteri.net se për vetëm një javë, numri i personave që kanë udhëtuar jashtë Kosovës, përfshirë mërgimtarët që kishin ardhur për festat e fundvitit, ishte mbi 83 mijë persona që udhëtuan përmes aeroportit “Adem Jashari”.
E njëjta bëri të ditur se gjatë një jave janë realizuar 620 fluturime.
“83141 persona vajtje-ardhje kanë udhëtuar përmes aeroportit “Adem Jashari”. Janë realizuar 620 fluturime”, tha Gara./Reporteri.net/
