Një rrugëtim i veçantë dhe frymëzues përfundoi me sukses këtë javë, kur çifti kosovar me vendbanim në Zvicër, Shqipe Isufi dhe Halit Kadriu, mbërritën në Kosovë pas një udhëtimi prej rreth 1,800 kilometrash me biçikletë.
Për 14 ditë me radhë, ata pedaluan nga Zvicra drejt Kosovës, duke kaluar një sfidë jo të lehtë fizike dhe psikologjike. Me përkushtim, vullnet dhe dashuri për vendlindjen, çifti arriti të realizojë misionin që i kishte vënë vetes, duke dëshmuar se as distanca e madhe nuk mund ta zbehë lidhjen me atdheun.
Pas mbërritjes në Kosovë, Shqipe Isufi dhe Halit Kadriu u pritën nga Kryetari i Komunës së Gjilanit, Alban Hyseni, si dhe drejtori për Kulturë, Rini dhe Sport, Kushtrim Zeqiri.
Çifti u shpreh i lumtur dhe krenar për përfundimin e këtij rrugëtimi, duke theksuar se sfida ishte një simbol i dashurisë për vendin e tyre dhe një mesazh se lidhja me Kosovën mbetet e fortë pavarësisht viteve dhe distancës.
Ky udhëtim i jashtëzakonshëm mbetet një shembull i përkushtimit, vullnetit dhe lidhjes së pandashme që shumë bashkatdhetarë vazhdojnë ta ruajnë me vendlindjen e tyre./Radio Star/
