Platforma online për shitblerje “Merrjep” shfrytëzohet nga qytetarët për të shitur produkte të ndryshme. Mirëpo, disa prej tyre po shfrytëzojnë këtë hapësirë për të ofruar shitjen e një organi mjaft të rëndësishëm për njeriun – veshkën.
Madje, në këto shpallje specifikohet edhe grupi i gjakut të donatorit.
Disa kanë treguar se dikush tjetër ua ka vendosur numrin e telefonit në këto shpallje, prandaj telefonatat janë të vazhdueshme.
Personat që i bëjnë këto shpallje shprehen se detyrohen të ofrojnë veshkën për shkak të kushteve të vështira ekonomike.
Nga Ministria e Shëndetësisë kanë sqaruar se në vend nuk ka ligj për transplantim të organeve.
Sipas tyre, institucionet në vend nuk kanë kapacitete për t’i ofruar këto shërbime.
Mirëpo, ndryshe shprehet Pleurat Sejdiu, nga Oda e Mjekëve të Kosovës.
Sipas tij, është e pakuptimtë që në Kosovë nuk po ofrohet transplantimi. Sejdiu shprehet se kjo do të ndalonte pazaret e tilla të qytetarëve.
Ndërsa nga Policia e Kosovës kanë thënë që nuk kanë trajtuar ndonjë rast tjetër të kësaj natyre, përveç atij të vitit 2008, të njohur si “Medicus”. /express
