Një person i moshës 29-vjeçare ka humbur jetën si pasojë e të shtënave me armë zjarri në fshatin Pogragjë të Gjilanit. Rastin e ka konfirmuar Policia e Kosovës, e cila ka bërë të ditur se i dyshuari është në kërkim policor.
Sipas raportit të Policisë, rasti ka ndodhur më 11 tetor 2026, rreth orës 19:30, kur autoritetet kanë pranuar informacion për të shtëna me armë zjarri në këtë fshat.
Njësitë përkatëse policore dhe Prokurori i Shtetit kanë dalë në vendin e ngjarjes, ku ekipi mjekësor ka konstatuar vdekjen e viktimës, i lindur në vitin 1997.
Lidhur me rastin, Policia ka bërë të ditur se një person i dyshuar, shtetas i Kosovës dhe i njohur për organet e rendit, është vënë në kërkim policor, pasi dyshohet se është larguar nga vendi i ngjarjes pas kryerjes së veprës.
Policia e Kosovës, në koordinim me Prokurorin e Shtetit dhe njësitë përkatëse hetimore, është duke ndërmarrë veprimet e nevojshme për lokalizimin dhe arrestimin e të dyshuarit, si dhe për zbardhjen e plotë të rrethanave të rastit.
Deri më tani, në njoftimin policor nuk janë bërë të ditura rrethanat apo motivi i dyshuar i vrasjes.
