Nëse tymi do të tregonte drejtimin e tregtisë, ai këtë vit do të shkonte kryesisht nga Polonia drejt Kosovës.
Pavarësisht rritjes së çmimeve dhe fushatave të vazhdueshme kundër duhanit, konsumatorët në Kosovë duket se nuk e kanë “fikur” zakonin, ndërsa importuesit nuk e kanë ndalur furnizimin.
Të dhënat nga Dogana e Kosovës për periudhën janar-qershor 2026 tregojnë se Kosova ka importuar cigare në vlerë prej 84.5 milionë euro, duke konfirmuar se duhani vazhdon të mbetet ndër produktet me peshë në importet e vendit, raporton Gazeta10.
Sipas të dhënave të importit, Polonia kryeson bindshëm listën e shteteve prej nga Kosova furnizohet me cigare.
Vetëm gjatë gjashtëmujorit të parë të këtij viti, nga ky shtet janë importuar cigare në vlerë prej 47.33 milionë euro, ose rreth 56 për qind e vlerës totale të importeve të këtij produkti.
Pas Polonisë renditet Gjermania me importe në vlerë prej 13.58 milionë euro, ndërsa në vendin e tretë është Rumania me 11.11 milionë euro.
Në mesin e vendeve të tjera nga të cilat Kosova ka importuar cigare janë edhe Bullgaria me 3.73 milionë euro, Turqia me 3.64 milionë euro, Maqedonia e Veriut me 2.77 milionë euro, Greqia me 782 mijë euro, Portugalia me 750 mijë euro, Kroacia me 668 mijë euro dhe Serbia me rreth 120 mijë euro.
Në total, gjatë periudhës janar-qershor janë importuar cigare në vlerë prej 84.5 milionë euro.
Shifrat tregojnë se tregu kosovar vazhdon të mbështetet kryesisht në importet nga vendet e Bashkimit Evropian, ndërsa Polonia mbetet larg para të gjitha vendeve të tjera si furnizuesi kryesor i cigareve për Kosovën. /GAZETA10/
