Haziri tha se ndërhyrjet në menaxhmentin e Hidromoravës po bëhen për interesa politike, ndërmarrja është në kaos.
Nënkryetari i Lidhjes Demokratike të Kosovës, Lutfi Haziri, ka folur për zhvillimet e fundit në Kompaninë Rajonale të Ujësjellësit “Hidromorava” në Gjilan, pasi Bordi i kësaj ndërmarrjeje ka shkarkuar nga pozita ushtruesin e detyrës së kryeshefit Abdylaziz Selmanin, rreth dy muaj pasi mori pozitën.
Haziri ka thënë se ky shkarkim është politik teksa e ka quajtur jo profesional ushtruesin e ri të detyrës së kryeshefit Granit Sylejmanin.
Ish-kryetari i Gjilanit, ka thënë se ndërhyrjet politike në menaxhmentin e kësaj kompanie e kanë sjellë në gjendje kaosi teksa shtoi se ndërhyrja e Bordit ka qenë me porosi partiake.
“Zhvillimet në menaxhment në 48 orët e fundit, janë shqetësuese, sepse është shkarku tash edhe ushtruesi i detyrës së kryeshefit përkundër që drejtori ekzekutiv i zgjedhur në mënyrë legale, ka arrit me stabilizu financiarisht ndërmarrje është shkarku, është në procedurë gjyqësore rasti i tij, shkarkimi i u.d. është shqetësuese sepse tani është pru një ushtrues detyre i cili nuk ka të bëjë asgjë profesionalisht me ujëra, asnjë kriter nuk e plotëson për menaxhimin e ndërmarrjeve publike regjionale, aq me pak programeve projekteve që janë pjesë të kontraktume të komunës sonë dhe të BERZH-it si institucion financiar në këtë rast. Kemi ndërhyrje në menaxhment për motive politike partiake, do të rrezikojë seriozishtë edhe projektet edhe qëndrueshmërinë financiare të ndërmarrjeve”.
“Mendojë që shkarkimi i ushtruesit të detyrës ka motive politike, është shfrytëzu keq ai kuadër i vjetër i Hidromoravës sepse është një prej kuadrave me përvojën ma të madhe, ne kemi shprehur pakënaqësi edhe në shkarkimin e drejtorit ekzekutiv, sepse për arsye puro politike partiake është shkarkuar, pa e vlerësu performancën që ka qenë pozitive nga organet tjera dhe ndërhyrja e bordit ka qenë me porosi partiake, edhe në rastin e dytë ushtruesi i detyrës në prag të pensionimit është shkarku, i cili nuk është leju me përmbyll një proces deri në zgjedhjen e drejtorit të ri përkundër konstatimit se është bërë shpallja e konkurseve ose është bë organizime tjera pa dijen e bordit. Bordi nuk ka rol tillë por miraton politika zhvillimore dhe nuk merret me menaxhim ditor. E vetmja detyrë menaxheriale është zgjedhja e drejtorit, por në procesin e rekrutimit, këto janë në pjesën e administratës e që kompetencë është edhe e divizionit të ndërmarrjeve publike të Ministrisë së Ekonomisë. Por në këtë rast ndërhyrjet feminore dhe të pa arsyetime kanë shkaktu kaos menaxherial sepse në të njëtën kohë kanë angazhuar shumë kontrata në vepër e që Hidromorava ka nevojë për inxhinier të ujërave si profil e jo të shkencave politike”, ka deklaruar Haziri në një konferencë për media.
“Avaria që është shkaktuar nuk do të evitohet sepse në janar, Hidromorava rrezikon mos me pas mjete të mjaftueshme me i dhan rrogat e punëtorëve, në kohë kur para 9 muajve ndërmarrjen Hidromorava unë e kam lënë me bilanc mbi 600 mijë euro mjete kesh për programe zhvillimore”, tha mes tjerash nënkryetari i LDK’së.
