42,700 qytetarë të Kosovës janë larguar nga vendi vetëm gjatë vitit 2021 e që vetëm një numër i ulët i tyre janë kthyer. Kësisoj, numri “neto” i emigrantëve është 38 mijë.
Drejtori për statistika të popullsisë në Agjencinë e Statistikave të Kosovës i ka thënë Ekonomia Online se vende ku migrojnë shqiptarët e Kosovës kryesisht janë ato të Bashkimit Evropian.
“Ne e kemi publikuar vitin e kaluar një raport që është në bazë të vlerësimit dhe në atë raport janë evidentuar 42 700 e me shumë banorë që kanë migruar. Por, një pjesë e tyre është kthyer dhe migrimi neto për vitin 2021 është rreth 38 mijë banorë më pak që e kanë lëshuar Kosovën. Zakonisht kosovarët udhëtojnë në vendet e Bashkimit Evropian, pjesa dërrmuese, por një pjesë e vogël në SHBA dhe Kanada apo vende të tjera. Por, është një numër shumë i vogël në krahasim me migrimin në vendet e Bashkimit Evropian”, u shpreh Kastrati.
Mosha mesatare e atyre që largohen për në vendet e perëndimit është kryesisht mes 21 dhe 28 vjeç.
“Ka struktura të ndryshme të popullsisë, por pjesa dërmuese, mbi 80 për qind, nga të dhënat e Bashkimit Evropian dhe burimet e tjera, janë të rinj, kryesisht grup mosha 21 deri 28; pjesa dërmuese e tyre është në moshë të re”, ka thënë Kastrati për Ekonomia Online.
I njëjti trendi i ikjes e ka përcjellë Kosovën edhe gjatë vitit 2022, megjithatë ende nuk ka shifra zyrtare.
