Drejtoria Komunale e Arsimit në Komunën e Gjilanit ka shpallur konkurs për plotësimin e vendeve të lira të punës në institucionet edukativo-arsimore të komunës, duke hapur gjithsej 33 pozita për edukatorë, mësimdhënës dhe profesorë të profileve të ndryshme.
Sipas njoftimit zyrtar, konkursi është shpallur në përputhje me Ligjin për Zyrtarët Publikë, Ligjin e Punës dhe aktet nënligjore në fuqi, ndërsa procedura do të zhvillohet sipas rregulloreve të Ministrisë së Arsimit.
Pozitat e lira përfshijnë vende pune në institucionet parashkollore, shkollat fillore dhe të mesme të ulëta (SHFMU) si dhe në shkollat e mesme të larta (SHML).
Ndër profilet për të cilat kërkohen kuadro janë:
Edukatorë për institucionet parashkollore;
Mësimdhënës të klasës;
Mësimdhënës të gjuhës angleze;
Mësimdhënës të gjuhës shqipe;
Mësimdhënës të muzikës (piano dhe instrumente);
Mësimdhënës të TIK-ut;
Profesorë të fizikës;
Profesorë të biologjisë;
Profesorë të vizatimit figurativ dhe shkencave kompjuterike.
Vendet e punës janë të shpërndara në disa institucione arsimore të Gjilanit dhe fshatrave përreth, përfshirë IP “Ardhmëria 1”, SHFMU “Musa Zajmi”, SHFMU “Selami Hallaqi”, SHFMU “Ramiz Cërnica”, SHFMU “Nazmi Hoxha”, SHFMU “Rexhep Elmazi”, SHML “Zenel Hajdini”, SHML “Marin Barleti” dhe SHML “Adem Jashari”, ndër të tjera.
