Gjilani dhe Drita përballen sot në derbin e Anamoravës, në një sfidë që pritet të sjellë emocione të mëdha në fushën e lojës. Për herë të parë në histori, derbi i qytetit të Gjilanit do të zhvillohet në mbrëmje, nën dritën e reflektorëve.
Ndeshja, e vlefshme për xhiron e kampionatit 2026/27 në Albi Mall Superligë, nis në orën 19:00 dhe do të zhvillohet në stadiumin me bari sintetik në Gjilan.
Përballja e sotme është derbi i 57-të kampional ndërmjet dy skuadrave gjilanase. Përveç ndeshjeve të kampionatit, Gjilani dhe Drita janë përballur edhe shtatë herë në kuadër të Kupës së Kosovës.
Edhe pse derbi tradicionalisht shoqërohet me atmosferë të jashtëzakonshme në tribuna nga ‘Skifterat’ dhe ‘Intelektualët’, ndeshja e sotme do të zhvillohet pa praninë e dy tifogrupeve. Stadiumi me bari sintetik nuk i plotëson kushtet për t’i akomoduar të dyja tifozëritë, ndërsa në stadium do të jenë vetëm tifozët vendas.
Në aspektin statistikor, Drita ka bilanc më të mirë në përballjet kampionale. ‘Bardhekaltërit’ kanë regjistruar 21 fitore, ndërsa Gjilani ka triumfuar në 15 raste. Plot 20 ndeshje kanë përfunduar me rezultat të barabartë.
Derbi i sotëm është gjithashtu përballja e parë mes dy skuadrave në këtë edicion të Superligës, ndërsa veçantinë e tij e shton fakti se për herë të parë në histori kjo përballje zhvillohet në orët e mbrëmjes, nën dritat e reflektorëve.
Bilanci në kampionat
Drita – 21 fitore
Gjilani – 15 fitore
Barazime – 20 ndeshje
Derbi i Gjilanit mbetet një prej përballjeve më të veçanta të futbollit kosovar, me një histori të gjatë dhe rivalitet të fortë sportiv që vazhdon të tërheqë vëmendjen e futbolldashësve në të gjithë vendin.
Sonte, historia shkruan një kapitull të ri: Gjilani – Drita, për herë të parë nën dritën e reflektorëve.
