Maqedonia e Veriut ka marrë vendim që nga data 16 gusht të gjithë personave që nuk kanë marrë të paktën një dozë vaksine tu ndalohet puna dhe organizimi i çdo lloj evenimenti në të gjitha objektet e hotelierisë dhe kafiteritë, transmeton Gazeta Sinjali.
Certifikatat do të kontrollohen nga shërbimi i sigurisë dhe kjo masë do të jetë e vlefshme për pjesëmarrjen në çdo lloj objekti, përfshirë objektet e hotelierisë, ku ka më shumë se 30 persona të pranishëm dhe do të jenë të vlefshme për pjesëmarrjen në festa, koncerte, seminare, trajnime, punëtori, konferenca, ngjarje kulturore ose sportive.
Bashkëngjitja dhe posedimi i një certifikate imunizimi me të paktën dozën e parë të vaksinës do të zbatohet për personat mbi 18 vjeç.
“Deri më 15 gusht, të gjitha objektet e hotelierisë të regjistruara për festimet lejohen të punojnë në ambiente të mbyllura, vetëm në përputhje me masat Covid-19, me kapacitet deri në 40% të ambientit dhe një maksimum prej 250 mysafirësh, sipas protokolleve ekzistues në fuqi. Për klubet e natës (disko), kabaret, baret, ndalimi i punës në pjesën e mbyllur të objektit mbetet, përveç në pjesën e hapur (tarracat) me 50% të kapacitetit të hapësirës dhe një numër të kufizuar vizitorësh deri në 1 000 vizitorët, sipas protokolleve ekzistues“, informoi sonte kryeministri Zoran Zaev në profilin e tij në Facebook pas mbledhjes së qeverisë.
