Kryeprokurori i Shtetit, Aleksandër Lumezi ka kërkuar nga kryeprokurorët e prokurorive themelore, kryeprokurori i Prokurorisë Speciale, kryeprokurori i Prokurorisë së Apelit dhe kryesuesi i Këshillit Prokurorial të Kosovës (KPK) mbrojtje të integritetit të procesit zgjedhor, rritje të efikasitetit në trajtimin e lëndëve të korrupsionit, krimeve ekonomike, krimit të organizuar, dhunës në familje dhe veprave tjera penale.
Një gjë e tillë u bë e ditur përmes një komunikate për media, ku thuhet se të martën kryeprokurori Lumezi ka mbajtur kolegjium me të lartpërmendurit, me ç’rast ka adresuar çështjet me interes në funksion të sundim të ligjit në Republikën e Kosovës.
Aty thuhet se me rastin e mbajtjes së zgjedhjeve lokale të 17 tetorit 2021, kryeprokurori Lumezi ka kërkuar nga të gjithë kryeprokurorët dhe prokurorët angazhim maksimal në mbarëvajtjen dhe mbrojtjen e integritetit të procesit zgjedhor.
“Si Kryeprokuror i Shtetit pres që nëpërmjet hetimeve të shpejta dhe të plota, me seriozitet maksimal dhe në kohë të vlerësohet çdo informacion, kallëzim penal apo çfarëdo e indicje tjetër për kryerjen e veprave penale që cenojnë procesin zgjedhor, duke siguruar që të gjithë qytetarët të kenë mundësinë të shprehin vullnetin e tyre të lirë përmes një procesi demokratik, të drejtë dhe sipas standardeve dhe vlerave perëndimore”, thuhet të ketë potencuar mes tjerash Kryeprokurori i Shtetit.
2021
“Gjatë këtij takimi rëndësi të posaçme i është dhënë aplikimit të ligjit për kompetencat e zgjeruara për konfiskimin e pasurisë së fituar me vepër penale, ku Kryeprokurori Lumezi ka kërkuar angazhim më të madh dhe proaktiv të kryeprokurorëve dhe prokurorëve që krahas ngritjes së akteve akuzuese, të gjurmojnë dhe të identifikojnë pasuritë që dyshohet të jenë fituar me anë të veprave penale, veçmas veprave penale që kanë të bëjnë me abuzimin e fondeve publike.”, thuhet në komunikatë.
Tutje, bëhet e ditur se në këtë takim u adresuan edhe rritja e bashkëpunimit institucional lidhur me rastet e korrupsionit, trajtimi i raporteve të Auditorit të Përgjithshëm, sfidat në zgjidhjen e rasteve të trashëguara me persona të panjohur (PPP), si dhe ngritja e efikasitetit në trajtimin e rasteve të bashkëpunimit juridik ndërkombëtar.
“Me qëllim të rritjes së transparencës dhe avancimit të komunikimit publik, Kryeprokurori i Shtetit ka kërkuar nga të gjithë kryeprokurorët që të bashkëpunojnë ngushtë më të gjithë zyrtarët për komunikim publik të prokurorive që ata i drejtojnë, në mënyrë që mediat, shoqëria civile dhe publiku në përgjithësi të njoftohen në vazhdimësi me punën, aktivitetet dhe rezultatet e organit të akuzës.”, bëhet e ditur në komunikatë.
Aty thuhet se në fund të takimit, Kryeprokurori i Shtetit ka kërkuar nga kryeprokurorët që të ngritët performanca në luftimin e korrupsionit, krimit të organizuar, krimeve ekonomike, me theks të veçantë sekuestrimin dhe konfiskimin e pasurisë, trajtimin e krimeve luftës dhe dhunës në familje, si dhe të avancohet llogaridhënia dhe profesionalizmi i punës së prokurorive që ata drejtojnë. /BetimipërDrejtësi
