Prokuroria Themelore në Mitrovicë, u ka bërë thirrje të gjithë qytetarëve, që të mos bien pre e mashtrimeve nëpër platforma të komunikimit, përmes së cilave po u kërkohen të dhëna personale të kartelës së llogarive bankare.
Sipas Prokurorisë së Mitrovicës qytetarëve nga persona të paautorizuar u kërkohen të dhënat personale të kartelës së llogarive nëpër bankat vendore, prandaj luten qytetarët që assesi të mos shpërndajnë këto të dhëna.
“Njëkohësisht u bëjmë apel të gjithë qytetarëve që kanë pranuar kërkesa të tilla dhe atyre që kanë shpërndarë të dhënat e llogarive bankare dhe potencialisht janë dëmtuar, që të lajmërohen në stacionin më të afërt policor të vendbanimit tuaj për të dhënë deklaratë në cilësinë e të dëmtuarit/dëshmitarit”, thuhet në apelin e Prokurorisë.
